زوّادة اليوم

موضوع: زوّادة اليوم الثلاثاء يوليو 29, 2014 7:58 am

بيخبرو عن ضيعة بعيدة فيا محل ببيع تياب حسب المشاعر! مثلا بيجي زبون بدو بدلة تعاسة بيعملو البياع بدلة سودا غامقة بس يلبسها بيصير تعيس، اذا بدو توب للحب بيعملو توب احمر بيصير الزبون يحب، اذا بدو توب للفرح بيفصلو توب بس يلبسو الشخص بيفرح. هونيك يوم بيجي رجال بيطلب يحكي مع البياع عا انفراد. بس يصيرو وحدن بيقلو الرجال قاصدك بخدمة بدي توب يبعد عني الحب و الناس. احتار البياع اول مرة بينطلب منو هالشعور و ما عندو هيك توب بالمحل بس وعدو للزلمي يأمنلو طلبو. بعد كم يوم بيخلص التوب و بيجي الزبون يستلمو بيكون توب غريب عجيب ساعة بيبين من احلى الألوان ساعة بيسود بيصير كتير بشع. عجبو كتير للزبون لبسو و سأل البياع: دخلك ما قلتلي شو اسمو هالتوب؟ رد البياع: اسمو توب الغيرة! بس ضهر عالحياة ما بقي حدا بيحكي معو لا اهل لا اصحاب لا قرايب. الغيرة بعدت عنو الكل! نسي اللحظات الحلوة اللي قضاها مع اللي بيحبن ليحل محلها لحظات الشك والاتهام. حب التملك بدل من حب التشارك. مرقت السنين والرجال لابس هالتوب و ما بقي حولو حدا. وكان يقول دايماً شو بحب هالتوب حققلي حلمي انو عيش وحدي اريح راس بلا هم الناس. الزوادة بتقلنا انو اذا شفت اللي بتحبن عم يبعدو عنك واحد ورا التاني كون اكيد انو الغيرة هيي السبب!الغيرة و الأنانية كتير قراب من بعض و سوا بيساهمو انك تصير عايش بعالم وحدك. بعالمنا اليوم كتير زايدة هالظاهرة يمكن الرجال اللي بالقصة موزع نسخ من توبو عا هالناس! كلن بيغارو من بعضن و طمع و حسد و حقد و كلو ما بيحرز! مش هيك علمنا يسوع! هوي اللي عاش حياة تضحية و حب لكل الناس لعدوو قبل صديقو حتى يكون متل لإلنا و نحنا بعدنا ماشيين مغمضين! صلاتنا اليوم تا ربنا يفتحلنا عيوننا عا حقيقة حبو تا نعيش متلو و الله معكن

» زوّادة اليوم : 17 / 9 / 2014 /
» زوّادة اليوم : " أتحبّني " ؟
» زوّادة اليوم : قيمة الإنسان
» زوّادة اليوم
» زوّادة اليوم : رح تصليلي ؟