درب جلجلتكن طويل بهالنقطة من العالم، وصليب المسيح بهالشرق على أكتافكن
أعداؤكن كتار لأنهم أعداء الصليب.
ما تجعلوا منهم أعداء لإلكم.
احكوهم دايماً بلغة الصليب ولو كانوا أعداؤكم بسببو.
الشهور والسنين اللي جايي رح تكون صعبة كثير، وقاسية ومرّة وثقيلة ثقل الصليب.
احملوها بصلاة عميقة من الإيمان، وبصبر من الرجا، وبمحبة من الصليب.
العنف رح يملّي الأرض، الكوكب رح يتجرّح بسكاكين الجهل والحقد
الشعوب المحيطة فيكن كلها رح تترنّح تحت الألم، الخوف
رح يكون على كلّ الأرض متل الرياح، والحزن بقلوب البشر.
ناس جاهلين وحاقدين رح يتحكمّوا بمصير شعوبهم وياخدوهم على البؤس والموت
عن طريق الحقد الأعمى اللي رح يسمّوه عدالة، وعن طريق الجهل المظلم اللي رح يسمّوه ايمان.
الحقد والجهل رح يعموّا أرجاء المعمورة.
إثبتوا إنتو بالإيمان والمحبة.
رح يتغيّر وجّ الأرض، حافظوا إنتو على وجّ المسيح.
حدود وجماعات وأنظمة بشرية رح تنمحى وتنكتب عن جديد
وشعوب رح تترنّح تحت النار والحديد.
خلّوا محبّتك بلا حدود وجماعتكم الكنيسة ونظامكم الإنجيل
وكونوا إنتو المرساة اللي بتهدّي السفن الشاردة بالبحار الهايجة
وقلوبكم موانئ سلام لكلّ تايه ومشرّد ومستجير.
بصلواتكم بترشوا محبّة عالأرض.
صلّوا تا تلين القلوب المحجرّة وتتفتّح العقول المعتمّة وتخفّ الويلات والأهوال.
ما تخافوا بالنهاية رح يشرق نور المسيح، وتشعّ علامة الصليب وتتألق الكنيسة.
إثبتوا بايمانكم بالمسيح وما تخافوا، وثقوا بإله القيامة والحياة، مجدو دايماً آتي.
ومما جاء أيضاً في الرسالة:
- الصليب هو مفتاح باب السما، ما في مفتاح غيرو..
كل مسيرة حياتكن مشوار صوب هالباب.
- احملوا صليب المسيح بفرح وعزم وشجاعة، ما تبالو بالساخرين
وما تتوقفوا وتبكوا قدام النايحين.
- البكي والنواح ما بيصنعوا تاريخ الخلاص، ولا قرع الصدور والندب بيفتحوا باب السما.
دمعة التوبة ما بنتزل الاّ على خدّ المؤمن الشجاع.
- ضعفك حتى تتغلّب عليه مش حتى تتحجج فيه.
بس تحمل صليب المسيح، لا الألم بيلويك ولا التعب بيهدّك
وبتمشي بثبات وصبر وبصمت.
عند وصولك للباب فرح عبورك رح يفوق بكتير المك وتعب سيرك..
(رسالة مار شربل للسيّد ريمون ناضر، الرسالة الرابعة: ضعفك حتّى تتغلّب عليه)
وفي رسالة شغلك بهالدني، يقول القديس شربل:
ما تخافو الشرّ رح يدمّر ذاتو.
اسم مريم العدرا بيبدّد الظلمة الظلمة وبيسحق الشرّ.
كونوا رهبان بقلب هالعالم، ولو بدون ثوب.
ازرعو الأرض صلا وبخور.
كونوا قديسين وقدسوا الأرض.
درب القداسة طويــل، لكن تأكدوا إنّو لمّا بتكون أفكار الله بعقولكن
ومحبة الله بقلوبكن، بتكون قوّة الله بزنودكن وبتوصلو...
(رسالة القديس شربل الثالثة للسيد ريمون ناضر)
تــــم نقـــل هذا المنتدي إلي موقع آخــــر ... 
الأربعاء يوليو 30, 2014 9:18 am
