آخر أيّام السّنة كما آخر أيّام العمر

1- انك تعترف.. دى لوحدها وقفة مع النفس ليها قيمتها.. متكسلش عن سر الاعتراف، لأنه فى نعمة وانت محتاجه وتاخد زقة روحية لحياة روحية أفضل ، نستعد لاستقبال سنة جديدة بالاعتراف

2- شوف ايه تدريب وعدت ربنا تعمله طول السنة اللى فاتت وغالباً مكنتش أمين فى وعدك، زى مثلاً:

- تدريب انك تصحى فى ½ الليل ولو ½ ساعة تصلى وتكلم ربنا

- صلاة يسوع 100مرة، يجوز ابتديته ومكملتوش

- زيارة مريض كل أسبوع

- نعمل خير بشكل عملى، مع واحد غير مسيحى

- بقدر الامكان كخدام، ميفوتش يوم من غير انجيل وياحبذا ½ ساعة

حاول فى أخر 10أيام، تسترجع الحاجات دى، انك نجحت فى التداريب دى قبل كده، فده يبقى حافز ليك انك تكمل

3- لو شاطر، تاخد ساعتين خلوة من هنا لأخر السنة، تراجع فيهم السنة كلها ولو شاطر تراجع

العمر كله، لو كانت قعدة هادية جميلة هتفرق معاك كتير

4- شوف مين زعلان منك، ومتدخلش على سنة جديدة من غير ماتصالحه مهما كلفك من محايلة ومن انكسار لكرامتك، متفضلش تقول بقى: هو اللى مبيعجبوش، ده ه اللى ابتدا.. انت اللى هتخسر

5- ابتدى احضر تسبحة، خصوصاً اننا فى شهر كيهك، جرب كده قول: السنة دى هاخد ليلة للصبح، على الأقل أبقى عملت "اسهروا" دى مرة فى عمرى

6- السنة راحت كلها من غير ما اقرأ الانجيل كويس، طيب ما تحاول تطلع لك بمزمور جديد تحفظه فى الـ10أيام دول وتردده على طول

7- فى ناس بتيجى فى الـ10أيام دول وتحاول تتناول كل يوم أو يوم ويوم، وتحاول تغسل عقلها وقلبها فى القداس.. مش على شكل العادة لكن كتقوى وتوبة.

8- انا قصرت فى الخدمة أوى، انا هاذكر أسماء كل الخدام اللى معايا وكمان أسماء المخدومين واحد واحد باسمه

9- اعتبر ان 2013/ 12/ 31 / نهاية شوف بقى من هنا لساعة [url=tel:12 / 2013/12]12 / 2013/12[/url]/31/ هتعمل ايه؟ !، ممكن ترن فى دماغك فكرة عمرك ما فكرت فيها، أو ربنا يحط فى قلبك شعور عمرك ما حسيت بيه قبل كده، أخر 10 أيام فى عمرك، هتاكل ازاى، هتنام ازاى وهتتكلم فى ايه

10- لو واحد فيكم بيكتب خبرات أو مذكرات، ساعات بيبقى مناسب انك تفتح المذكرات دى وتقلب.. لو كانت تحضيرات أو واجبات لخدمة اسأل نفسك: انا عملت ايه من الكلام ده كله..

11- زى ما عايز تعلى فى الانجيل وفى الصلاة، اعلى فى العطاء بدل الـ 1/10 خليها الـ1/4 ولا الـ 1/2 كأنك بتقول: هفضل يارب اقطر عليك واديك بالشُح؟!!

12- ساعات شباب فى أخر 10 أيام يعمل ميطانيات كتير أو ينام على الأرض أو يصوم للغروب.. نفسه يقدم ذبيحة حب لربنا ممثلة فى جهاد مكثف من قلب تائب

13- ممكن يكون واحد أهمل فى قراءاته الروحية ويقول فى أخر 10 أيام هاجيب كتاب من كتب البابا زى كتاب الوداعة والتواضع أو التوبة والنقاوة وأذاكره كويس عشان ادخل على السنة الجديدة والالفكرة بتاعة الكتاب دى شغلانى

14- مع وجود السيديهات والعظات، ممكن الواحد يعمل مؤتمر لروحه، تسمع له 3- 4عظات وتكتب وتقف بعد كل وعظة تصلى وترنم، تاخد جرعة مكثفة لنفسك

15- تدريب "نظرة إلى بيوتنا" لأن أحياناً يكونوا اللى حوالينا تعبانين شوية أو صعبان عليهم مننا من انشغالنا بالخدمة عنهم، قول حقه عليا، اهملته بسبب الخدمة، طيب خاطره واهتم بيه وشجعه

16- اصطاد 3أشخاص للخدمة يستروا عليك قدام ربنا، كتير من الناس بتنصلح حياتهم جوه الخدمة، ويبقوا لهيب نار ويجيبوا ناس كتير لربنا يشفعوا لنا قدامه

17- الخطايا المتكررة زى: الادانة والقلق، صلى كل يوم وقول: شيل عنى يارب كذا وكذا كأنك فى مرحلة خطيرة وعايز ربنا يشيل عنك قبل الهزيع الأخير

- خد فكرة واحدة من دول، وقول يارب ساعدنى فى أخر 10 أيام دول عشان أعملها

- وعندنا مفهوم مريح يسندنا هو أصحاب الساعة الحادية عشر، يعنى ربنا قبل ناس تشتغل فى الأخر خالص بس خدوها جد، ربنا عنده طيبة متلاقيهاش عند حد ابداً.. ده بتوع الساعة الأخيرة اداهم دينار زى اللى اشتغلوا اليوم كله.. قل له يارب: عايز الحق الكام يوم الاخرانيين دول عشان اقدمهم ليك

- ربنا له المجد بيقبل مننا حاجات تبدو بسيطة ولكنها فى نظره غالية زى ساكبة الطيب اللى راحت جابت الطيب الغالى ده ودلقته.. ومحدش عجبه التصرف ده واعتبروه تبذير.. لكن ربنا عجبه وقبله لدرجة انه يقول: "حيثما يُكرز بهذا الانجيل، يبشر أيضاً بما فعلته هذه المرأة تذكاراً لها"

يعنى انت يارب ناقصك طيب، يعنى هى لابشرت ولااستشهدت؟!! لكن عشان عملت حاجة طالعة من قلبها فعلاً لربنا

أظن لو الواحد فينا فكر يقدم حاجة لربنا .. هيلاقى

عشان ندخل لربنا بشكل أفضل فى السنة الجديدة

+++ لإلهنا كل مجد وكرامة من الأن وإلى الأبد.. أمين +++